Կանանց կարգավիճակի հարցերով հանձնաժողովը, որը առանցքային դեր է խաղում Պեկին + 25 գործընթացում, նախատեսում էր անցկացնել Պեկինի հռչակագրի և Գործողությունների ծրագրի 25-ամյակին նվիրված իր 64-րդ նստաշրջանը մարտի 9-20-ը Նյու Յորքում՝ ՄԱԿ-ի կենտրոնակայանում: Հայտնի է, որ նստաշրջանը պետք է հյուրընկալեր անդամ պետությունների և ոչ կառավարական կազմակերպությունների մոտ 12 հազար ներկայացուցիչներ ամբողջ աշխարհից: Սակայն հանձնաժողովի կազմկոմիտեն՝ վկայակոչելով COVID-19 կորոնավիրուսի տարածման հետ կապված վտանգները, որոշում կայացրեց կրճատել 64-րդ նստաշրջանի միջոցառումները և անցկացնել մեկ ընթացակարգային հանդիպում մարտի 9-ին: Նախատեսված բազմաթիվ հարակից և զուգահեռ միջոցառումները չեղարկվեցին:

Նստաշրջանի աշխատանքները սահմանափակվեցին ՄԱԿ-ի մի շարք կառույցների ղեկավարների՝ այդ թվում՝ ՄԱԿ-Կանայք կառույցի գործադիր տնօրեն Ֆումզիլե Մլամբո-Նգկուկայի և Կանանց կարգավիճակի հարցերով հանձնաժողովի նախագահ Մհեր Մարգարյանի ընթացակարգային ելույթներով, ներկայացվեց նաև ՄԱԿ-ի գլխավոր քարտուղարի զեկույցը Պեկինի խորհրդաժողովից հետո կանանց իրավունքների իրացման վերաբերյալ: