Պեկինի Գործողությունների ծրագրն ավելի քան հեղափոխական էր... Պեկինի համաձայնագիրը ոչ զուգադիպություն էր, ոչ էլ պատահականություն, այլ կառավարությունների, քաղաքացիական հասարակության և այլ գործընկերների միասնական և նպատակային գործողությունների արդյունք: Մենք միշտ պետք է նշենք դա, բայց միաժամանակ հիշեցնենք, որ Պեկինի օրակարգն անավարտ է: Հնարավոր խափանման ռիսկերը իրական են և գնալով ավելանում են։ Կանանց իրավունքները վտանգված և ոտնահարված են բազմաթիվ ոլորտներում, վերջին ժամանակահատվածում տեղի է ունեցել որոշակի հետընթաց և գենդերային անհավասարության մի շարք դրսևորումների վերածնունդ՝ հիմնված դարավոր խտրականության վրա:

Հայաստանը պատրաստակամ է իր փորձը փոխանակել միջազգային գործընկերների հետ և իր ներդրումն ունենալ մեր հավաքական ջանքերում՝ ուղղված կանանց իրավունքների պաշտպանությանը և զարգացմանը, ինչպես նաև հասարակական կյանքում նրանց դերի ուժեղացմանը։ Մենք կգործադրենք բոլոր հնարավոր ջանքերն այս օրակարգն առաջ տանելու նաև ՄԱԿ-ի Կանանց կարգավիճակի հարցերով հանձնաժողովի 64-րդ և 65-րդ նստաշրջաններում մեր նախագահության շրջանակներում։ Ամբողջ աշխարհում շուտով նշելու ենք Պեկինի հռչակագրի և Գործողությունների ծրագրի 25-ամյակը, որը կարևոր հնարավորություն է այս ուղղությամբ մեր ազգային և միջազգային ջանքերի արդյունքների վերաբերյալ համապարփակ ամփոփման և անկեղծ գնահատականի համար: